ME
NU
  • Isma' Ftit

Meta parti kbira mill-belt ta' Chicago spiċċat meqruda



Bħal-lum 150 sena ilu (fl-1871), in-Nar il-Kbir ta' Chicago beda fil-matmura ta' Patrick u Catherine O'Leary, u sa ma n-nar intefa għalkollox jumejn wara, parti kbira mill-belt spiċċat meqruda u madwar 300 persuna sfaw mejta.


In-nar, li beda fin-naħa tal-Punent tal-belt u nfirex b'mod allarmanti fi ftit minuti, seta' tqabbad minn xi vandali, ħallelin, ġirien, il-baqra ta' Catherine O'Leary, jew inkella kawża ta' reazzjoni kimika, madankollu s-sors baqa' mhux magħruf. Ir-riħ sħun u xott mil-Lbiċ spiċċa kaxkar in-nirien minn binja għal binja, anki minħabba l-fatt li dak iż-żmien binjiet bl-injam kienu prevalenti ħafna, u saħansitra anki dak il-bini li kien mibni apposta biex jilqa' min-nirien spiċċa sploda kawża tal-fjammi.


Kienu biss ix-xita, il-lag u l-artijiet mhux mibnija li waqqfu l-mewġa tad-distruzzjoni fl-10 ta' Ottubru. In-Nar il-Kbir ta' Chicago qered 17,450 binja li kienu jkopru kważi 9 kilometri kwadri. Terz tal-belt spiċċat meqruda għalkollox u madwar 100,000 persuna sfaw bla saqaf fuq rashom.


Minn Benjamin Camilleri

  • Facebook
  • Instagram

Isma' Ftit hu mmexxi minn turtle.mt.

Aħna niktbu dwar: ħsibijiet, riflessjonijiet, ġrajjiet kurrenti, arti, kitbiet, tagħlim u stejjer oħra li jnisslu pożittività.

© Isma' Ftit. Kull dritt riservat 2016 - 2021